КОЦУР – Стреду вечар, 4. марца, у просторийох Читальнї у Коцуре представени два членїци коцурского Активу женох – Рената Буша и Мария Дудаш-Фейса, и отворена вистава їх роботох.
Актив женох, хтори дїлує при КУД „Жатва”, традицийно кажди рок представя роботу єдней, лєбо вецей своїх членїцох. Рената и Мария роки члени Активу женох, а занїмаю ше з ручну роботу, окреме зоз шицом. Попри за други потреби, стаємно шию и народне облєчиво за аматерох КУД „Жатва”.
Вечар зоз своїм шпиваньом прикрашели Руска женска шпивацка ґрупа КУД „Жатва” и Церковни хор грекокатолїцкей церкви Успения пресвятей Богородици, а потим пречитани Марийово и Ренатово кратки биоґрафиї. У програми з рецитациями участвовали и дзеци з ОШ „Братство-єдинство” у Коцуре.
З тим збуваньом Актив женох означел и наступни Дзень женох, 8. марец. После програми у Читальнї, членїци Активу нащивели и Дом за старих у Коцуре, дзе хасновательом однєсли погосценє.
