ВЕРБАС – У рамикох порядних нащивох подручним канцеларийом (ПК) Националного совиту (НС) Руснацох по наших местох, предсидатель Вивершного одбору (ВО) НС Желько Ковач и секретар Совиту Таня Арва Планчак вчера нащивели ПК у Вербаше, у КПД „Карпати”.
О информованю, односно стану у вербаских медийох на схадзки бешедовала Еуфемия Ґшвенґ, а предсидатель ВО НС Желько Ковач гварел же по законченю поступку ликвидациї ЯП за информованє „Вербас, архиву того подприємства превежнє Архив Нового Саду.
О образованю присутних поинформовал Славко Сабо, а найвецей о можлївосци же би од септембра почала робиц ґрупа за пестованє руского язику у вербаскей Предшколскей установи.
Бешедуюци о култури, предсидатель КПД „Карпати” др Деян Загорянски винєсол тогорочни план роботи Дружтва, односно його секцийох, а найвецей бешедоване о наступним Хорским фестивалє „Карпати”, хтори того року у Вербаше будзе 21. мая. Вербащанє представительом НС винєсли и же им будзе потребна финансийна потримовка за одход на Фестивал русинскей култури у Свиднїку, у маю, понеже од орґанизатора уж достали урядову поволанку.
На схадзки було слова и о службеним хаснованю язика и писма у Вербаше, а представителє НС винєсли заувагу „з терену” же тогорочне националне швето Руснацох Вербащанє могли означиц и зоз шветочнєйшима змистами, а нє лєм зоз спортску манифестацию.
Попри горе спомнутих, спред ПК на схадзки присутвовали и Владимир Будински, Михайло Тамаш и Владимир Мученски.
Нащива вербаскей була друга тогорочна нащива подручним канцеларийом НС (перша була у Сримскей Митровици) и до конца априла би мали буц нащивени шицки ПК у наших местох.
