ЗАҐРЕБ – На инициятиву Ради рускей националней меншини Миклошевци и Општини Томповци, делеґация з Миклошевцох и томповскей општини вчера у Зеґребу нащивела соборского заступнїка за вецей национални меншини, медзи нїма и за руску, Велька Кайтазия.
У делеґациї були началнїк Општини Томповци Томислав Паненич, предсидатель Ради рускей националней меншини Миклошевци Мирослав Лїкар и Дюра Лїкар з Миклошевцох, як и секретар Представителя рускей националней меншини Городу Заґреб Йоаким Павлович, котри помогнул у орґанизованю тей нащиви.
На стретнуцу з Кайтазийом Општину Томповци представел єй началнїк, а Дюра Лїкар бешедовал о планох и програмох означованя дзепоєдних рочнїцох вязаних за живот и роботу жительох Миклошевцох. Так, того року би у Миклошевцох мали буц отримани 21. стретнуца руских школох, Дзень Руснацох, ювилейна, 30. Културна манифестация „Миклошевци 2015” и, як окреме наглашене – 165-рочнїца приселєня Руснацох на тоти простори. Попри рижних змистох, ювилей ше планує означиц и з промоцию фотомоноґрафиї „Миклошевци под сримским нєбом”, автора Дюру Лїкара.
У розгварки бешедоване и о почежкосцох присутних у наших школох дзе ше орґанизовано през наставу пестує руски язик и национална култура.
Соборски заступнїк Велько Кайтази виражел задовольство з предоченим од Миклошевчанох, а на сходзе заключене же, у поради з началнїком Општини Паненичом, за коло два мешаци нащиви Миклошевци и Општину Томповци, зоз своїма сотруднїками.