НОВИ САД – У новим чишлє новинох „Руске слово” рубрика „Тижньовнїк“ виглєдовала яки стан у апатикох после обявйованя новей систематизациї лїкох на тарґовищу, а ту и напис о локалних конкурсох по општинох дзе жию Руснаци.
О тим як означене школске швето Св. Сава по наших местох, о ришованю проблему нєисправней води за пице у Руским Керестуре, та о тим як дзепоєдни Руснаци у Швайцарскей означели Националне швето Руснацох у Сербиї – пише на бокох „Наших местох”. Рубрика „Економия” у тим чишлє спатрела яки бул стан у аґраре прешлого, и яки би могол буц того року.
„Култура и просвита” понука звити з премиєри представи у Вербаше „Як забиц предсидателя”, з Рочней схадзки РКУД „Др Гавриїл Костельник” у Кули и Шветовей конференциї славистики у Бечу, а представя и уметнїцу Кристину Ґшвенґ з Вербасу.
Рубрика „Духовни живот” на своїх бокох пише о пошвецаню обисцох по наших парохийох, док на бокох рубрики „Людзе, роки, живот” представени музичар, композитор, аранжер и музични педаґоґ Михал Лїкар з Дюрдьова.
„Спорт” пише о преглашеню найлєпших спортистох у Шидзе и Оджаку, а у „Трецим полчаше” представени Янко Саламун, дакедишнї дюрдьовски фодбалер. Як додаток у тим чишлє вишло „Литературне слово”.