НОВИ САД – На вчерайшей схадки Скупштини Городу Нови Сад, одборнїки зменєли дотерашнього предсидателя городского парламенту Синишу Севича и на тото место меновали Єлену Стоянович Црноґорац, з Єдинственей Сербиї (ЄС), преноши РТВ. Понеже нова предсидателька Скупштини Городу Нови Сад на положнїцким одсустве, тоту функцию будзе окончовац заменїк предсидателя Скупштини Мирослав Илич.
Схадзку зволал и водзел заменїк предсидателя Скупштини Мирослав Илич (Треца Сербия), а попри зменьованя и вибору нового предсидателя Скупштини, на дньовим шоре були и вименки у Кадровскей комисиї. Зменєни предсидатель кадровскей комисиї Дьордє Петрович, а на тоту функцию вибрани Александар Милованчев зоз Сербскей напредней странки (СНС).
Зменьованє Севича вимагали 45-еро одборнїки владаюцей векшини. Одборнїки ДС, Лиґи социялдемократох Войводини и Сербскей радикалней странки напущели схадзку.