РУСКИ КЕРЕСТУР – Заключеня з роботних схадзкох штирох одборох и подручних канцеларийох Националного совиту (НС), та плани за дальши активносци, тиж були єдна з темох пиятей порядней схадзки НС, хтора отримана всоботу, 12. септембра у Руским Керестуре.
Одбор за информованє и Одбор за службене хаснованє язика и писма принєсли заключеня и почали реализовац свойо плани, а Одбор за културу и Одбор за образованє, пре обсяжносц темох нє докончели схадзки, та пошвидко буду предлужени.
Замерковане же у Одборе за службене хаснованє язика и писма потребни фахови особи котри добре знаю руски язик и буду провадзиц нєправилносци на надписох по руски на локалних самоуправох, установох, институцийох и явних подприємствох у местох и општинох, та конкретни стан у тей обласци пошвидко спатри окремна комисия, на чолє з членїцу НС и народну посланїцу Олену Папуґа. Папуґова критиковала и же НС до тераз нє обезпечел правнїка хтори би ше занїмал з питанями важнима за НС, за провадзенє законох и їх вименки, а окреме тераз кед Сербия у процесу приступаня до ЕУ и Народна скупштина Сербиї приноши законски предписаня важни и за меншини, та и нашу.
Бешедуюци о заключеньох Одбору за образованє, найвекшу увагу виволало предкладанє же би ше послало допис на Филозофски факултет у Новим Садзе, Одсеку за русинсистику, деканови, як поведзене на схадзки – кед будзе потребне можебуц и до ресорного покраїнского секретарияту, и вимагало реґулованє видаваня потвердзеньох о знаню руского язика.
Членїца НС и директорка Школи „Петро Кузмяк” у Руским Керестуре Хелена Пашо Павлович винєсла же ше на роботу до ОШ (на руским язику) приявели два особи котри од Одсеку за русинситику маю потвердзенє же знаю руски язик, а насправди го нє знаю, та порушане питанє валидносци тих потвердзеньох. Прето ше будзе вимагац же би ше потвердзеня давало лєм особом котри преверено знаю руски язик.
На основи заключеня зоз заєднїцкей роботней схадзки, дзе предложене же би ше Одбор за образованє преширело и з членом зоз Сриму, з векшину гласох до Одбору мeнована Вера Дупало зоз Шиду. Предсидателька Одбору Мелания Римар визначела и же у Школских управох Зомбор и Нови Сад потребни просвитни совитнїк-Руснак, за цо ше треба цо скорей остарац, а з тоту инициятиву Руснацох упозната и Координация националних совитох на уровню держави.
Предсидатель Вивершного одбору НС Желько Ковач винєсол звит о тогорочней Лєтней школи руского язика за школярох ОШ з наших местох, хтора од 20. по 26. юлий отримана у Попрадзе, у Словацкей. Директорка керестурскей Школи Хелена Пашо Павлович звит дополнєла з оцену же Лєтня школа того року була барз добра, визначуюци и же нашо дзеци спознали же руски язик хасновити и у иножемстве.