Препатра ше звити и плани з подручних канцеларийох

автор зам
1.3k Опатрене

РУСКИ КЕРЕСТУР/НОВИ САД – Як за Рубрику на руским язику Трецей програми радия РТВ виявел предсидатель Вивершного одбору (ВО) Националного совиту (НС) Руснацох Желько Ковач, НС закончуюци рахунок придал на час, по 29. фебруар, цо бул обовязни зробиц як и шицки други установи и подприємства.

ВО НС з дзешец подручних канцеларийох НС достал звити о роботи и плани за першу половку того рока и тераз ше их препатра. З тима планами ше жада оможлївиц функционованє подручних канцеларийох як „НС у малим” и же би ше Руснаци у местох у котрих робя могли на нїх опрец и черпац моц за роботу у образованю, култури и у шицких других обласцох, гвари Ковач за радио.

По його словох, кажда подручна канцелария дава акцент на фестивал хтори ше отримує у єй месце, а хтори у Календаре репрезентативних манифестацийох Совиту. И попри тим же НС-у за тот рок зменшани средства, фестивали буду отримани, алє подручни канцелариї достаню средства за дзешец мешаци роботи, место за єденац, як було дотераз.

Як и прешлого року, Вивершни одбор будзе обиходзиц подручни канцелариї пре спознанє о стану „на терену”, з якима ше проблемами стретаю и цо посцигнуте у прешлим периодзе, цо будзе окончене по 30. април.

ПОВЯЗАНИ ТЕКСТИ