РУСКИ КЕРЕСТУР – У парохиї св. оца Миколая 6. януара, по григориянским календаре, вирни преславели швето Богоявлєнє Господнє, а вчера, 7. януара, почало и пошвецанє обисцох з воду хтора пошвецена на тото швето.
На Богоявлєнє Вельку Службу Божу служели домашнї священїки – парох о. Михайло Малацко и капеланє о. Владимир Медєши и о. Михайло Шанта. У казанї о. Медєши наглашел же Богоявнєнє швето з хторим ше здодадуєме на Исусово кресценє у рики Йордан. За вирних воно означує же з очисценьом вше можлїви нови початок у духовним живоце чловека.
На концу Служби священїки пошвецели воду хтора през цали рок у церкви и у домох вирних служи за шицки духовни и физични потреби, та вирни з нєй однєсли до своїх обисцох.
Зоз богоявлєнсьску воду ше пошвеца обисца, хторе почало вчера и, крем нєдзелями, будзе тирвац по 18. януар. Розпорядок пошвецаня оглашени на огласней табли у порти керестурскей церкви.