ШИД – Одборнїки Скупштини општини ( СО) Шид на вчерайшей схадзки по швидким поступку, а на предлог Општинскей ради, прилапели нову оцену вредносци капиталу Явного подпримємства Радио Шид, хтори оценєти на 838 000 динари, место милион 917 000 динари, як було на дзень 31. децембра 2013 року. Тиж дата и согласносц же би тот медий бул приватизовани по моделу збераня явних понукнуцох, з явним лицитованьом.
СО прилапела и звити о роботи за прешли и плани роботи за 2015. рок за шицки месни заєднїци, окрем за МЗ Вишнїчево, у хторей розпущени Совит пре нєдостаток кворуму, понеже штирме зоз седем членох дали задзекованє, цо була и окремна точка дньового шору на схадзки СО.
Прилапени и звит о роботи Дому здравя за прешли и план роботи за чечуци рок, як и звити о роботи Центру за социялну роботу, Народней библиотеки ,,Симеон Пищевич,” Културно-образовного центру, Ґалериї малюнкох ,,Сава Шуманович”, институциї култури од националного значеня и Музею наївней уметносци ,,Илиянум,”.
СО принєсла и Програму хаснованя средствох буджетского фонду за защиту животного штредку и меновала Кристину Радосавлєвич за директорку Туристичней орґанизациї Шид.