РУСКИ КЕРЕСТУР – На вчерайшей схадзки Совит Месней заєднїци прилапел закончуюци рахуном Месней заєднци (МЗ) Руски Керестур, спрам хторого цалосни приходи були 15 милиони 116 518 динари, а розходи 15 милиони 114 344 динари.
Прилїв до месного самодоприносу у прешлим року бул 12 милиони 165 975 динари, з буджету општини Кула достати милион, як власни средства МЗ прешлого року витворела 757 877, док за проєкти на основи конкурсох були достати 239 680 динари.
На основи розполагаюцих, нєподполних податкох, понеже остатнї час и месни самодоприноси состойна часц буджету Општини, прилїв до самодоприносу на основи роботного одношеня бул нє цали 6 и пол милиони динари, на основи власнїцтва жеми дацо вецей як 2 милиони 357 000, а на основи самостойней дїялносци нє цали 485 000 динари.
На схадзки дати и звит о плаценю самодоприносу за занятих у подприємствох и фирмох у Керестуре и других местох, а на Совиту заключене же би ше од одвитуюцей служби у Општинскей управи вимагало точнєйши звит, понеже, спрам спознаньох членох Совиту, велї подприємства поряднє уплацую самодопринос за роботнїкох, а нє евидентовани су.