БЕОҐРАД – Скупштина Републики Сербиї пияток, 20. новембра, прилапела Закон о леґализованю обєктох, хтори оможлїви швидши и туньши поступок леґализованя, а як гварела министерка будовательства, транспорту и инфраструктури Зорана Михайлович, циль Закону будзе озаконїц шицко цо годно.
Такса за обєкти хтори маю до 100 квадратни метери будзе 5 000 динари, до 200 квадрати 15 000, до 300 квадрати 20 000, а за обєкти хтори векши як 300 квадратни метери такса будзе 50 000 динари. За комерциялни обєкти до 500 квадратих будзе ше плациц 250 000 динари, за обєкти до 1 000 квадрати 500 000 динари, до 1 500 квадрати милион динари, а за векшу поверхносц цена три милиони динари.
У Сербиї єст милион и пол нєлеґални обєкти. По новим Закону, нє будзе ше их валяц покля поступок леґализованя нє будзе правомоцно закончени. Вимоги за леґализованє хтори придати по 29. януар 2014. року, а хтори нє ришени по ступанє того закона, буду закончени по нових одредбох.
Скупштина Сербиї пияток прилапела и вименки Закона о державним мераню и катастру, хтори предвидзую єдноставнєйши и швидши упис до катастру.