РУСКИ КЕРЕСТУР – Национални совит Руснацох всоботу, 20. децембра, прилапел ребаланс свойого буджету за тото рок, понеже после ребалансу буджету АП Войводини прилїв средствох звекшани за милион 160 000 динари, так же цалосни прилїв НС у тим року тераз 13 милиони 687 764 динари.
З ребалансом милион 800 000 динари опредзелєни за сплацованє половки висудзеного квартелю од Еви Барановей терашнїм власнїком на основи судского поровнаня, так же НС будзе власнїк цалого квартелю у Новим Садзе, велькосци 58 квадратни метери. По шлїдуюяцу схадзку НС би мало буц познате як ше будзе розполагац з тим квартельом.
Як його снователь, НС з ребалансом опредзелєл и 535 000 динари за рихтанє єдней представи у РНТ „Петро Ризнич Дядя”, понеже того року Театер од Покраїни, як главного финансиєра, достал средства лєм за єден проєкт.
На схадзки прилапени и Правилнїк о надополнєньох членом НС, його одборох и роботних целох за окончованє свох обовязкох, так же павшалне надополнєнє предсидателя НС, як волонтера, за пририхтованє схадзкох будзе 3 000 динари, за присуствованє на схадзкох надополнєнє членом НС будзе 1 500 динари, а за присуствованє на схадзкох члени Вивершного одбору, одборох и роботних целох буду доставац по 1 000 динари. Тиж буду виплацовани и драгово трошки за присуство на схадзкох и службени путованя – до 10 одсто цени литри евро-дизелу, а право на драгово трошки буду мац и особи котри на службену драгу пойду у мено НС.
Покля нє прейдзе на професйну роботу до НС, предсидатель Вивершного одбору Желько Ковач будзе мац волонтерски додаток 50 000 динари, а додаток секретара НС 13 000 динари мешачно.
Члени Совиту ше у дискусиї зложели же муши буц єдна особа котра як функционер будзе занята у Совиту и пошвецена лєм роботом вязаним за обовязки Националного совиту.
Тиж прилапена и Одлука о дочасовим финансованю НС, хтора будзе важаца по приношенє нового буджету Совиту, а по всоботу прилапеним ребалансу, до идуцого року буду пренєшени нє цали 230 000 динари.
