НОВИ САД – На остатнєй схадзки Скупштини Городу Нови Сад, хтора отримана концом прешлого тижня, одборнїки прилапели звит о вивершеню буджету Городу Нови Сад, як и перши ребаланс городскей каси.
Опозиция критиковала же Город ма мало проєкти, як и же ше вельо пенєжи уклада до Туристичней орґанизациї Нового Саду, а нє обачиц ефекти, на цо член Городскей ради за привреду Милорад Райович гварел же ше укладаня виплаца, понеже Нови Сад рочнє ма од 80 до 90 милиони долари приходу.
На основи ребалансу прилапени и вименки одлукох о дїлованю городских подприємствох, установох и управох, сновательни акти городских подприємствох у складзе з новим Законом о явних и комуналних подприємствох, та одредзена Видовданска награда за школярох основних и штреднїх школох.