Прилапени ребаланс финансийох, буду послати вимоги до Дому здравя и Општинскей управи

автор зам
1.2k Опатрене

РУСКИ КЕРЕСТУР – Совит Месней заєднїци (МЗ) Руски Керестур на вчерайшей схадзки ускладзел свой тогорочни финансийни план з нєдавним ребалансом буджету Општини Кула, по хторим средства МЗ  звекшани за 203 000 динари и тераз виноша 23 милиони 123 000 динари.

Предсидатель Совиту Владимир Олеяр винєсол информацию же концом мая будзе закончени други тендер за оправянє закрица на Здравственей амбуланти у Керестуре, та би после того мали почац и роботи, а вязано за Дом здравя, на инициятиву члена Совиту Тихомира Фейдия, заключене же би ше до тей установи послало вимогу за стаємну порядну роботу дзецинского лїкара у керестурскей Амбуланти.

Тиж так, до Општинскей управи Кула будзе послата и вимога же би матичарка у керестурскей Месней канцелариї ту робела цали тидзень, а нє як тераз – же два днї у тижню роби у Крущичу, а три днї у Керестуре.

На схадзки Совиту бешедоване и о нєзадовольстве гражданох же власнїк терашнього погосцительного обєкту у дакедишней Мензи опрез нєй з цеглох дзвигнул простор за лєтню заграду, дзе ше паркирує превозки пре одход до Здравственей акбуланти.

Владимир Олеяр поинформовал членох Совиту же на його инициятиву була комунална инспекция, хтора направела записнїк и наложела же у чаше од 30 днї тоту лєтню заграду муши склонїц, лєбо за ню достац дозволу од Заводу за урбанизем.

На тей 24. схадзки Совиту МЗ у тим зволаню першираз присуствовала и Саня Тиркайла, як нови член Совиту по числу освоєних гласох з лїстини, после задзекованя Владимира Югика.

3-MZ-02

ПОВЯЗАНИ ТЕКСТИ