СРИМСКА МИТРОВИЦА – Всоботу, 6. юния, у парохийним доме грекокатолїцкей церкви у Сримскей Митровици отримана ище єдна креативна роботня за дзеци, хтору водзи парох о. Владислав Варґа, з волонтерами. На роботнї були и дзеци предшколского возросту, а робело ше на християнски теми, прилагодзено їх возросту.
О тидзень у Сримскей Митровици починаю роботи на реновированю закрица на церкви, а тераз тирва акция добредзечного збераня пенєжу за тоту намену, о чим о. Варґа поинформовал шицки грекокатолїцки фамелиї у Митровици. Понеже ше вирни уж почали явяц, о. Варґа ше наздава же буду назберани и потребни средства за обнову закрица на церкви.
Попри материялней, у нашей грекокатолїцкей церкви тирва и свойофайтова духовна обнова, понеже ше звекшує число кресцинох и винчаньох, так же и вчера по Служби Божей кресцени єден хлапец, а церква була полна з дзецми и їх родичами.
