БЕОҐРАД – Пробни Закончуюци испит за школярох осмих класох будзе отримани на пияток и соботу, 9. и 10. априла, у шицких школох на териториї Републики Сербиї.
На пияток ше будзе пополньовац тест зоз математики, а на соботу тест зоз сербского, односно мацеринского язика и комбиновани тест.
Министерство просвити, науки и технолоґийного розвою сообщело же ше испити отримаю у школох по точно утвердзених правилох.
Єдно з нїх же у ґрупох нє шме буц вецей як 15 школярох, а обовязне и почитовац шицки епидемиолоґийни мири.
Закончуюци испит за маломатурантох заказани за 23., 24. и 25. юний, а упис до штреднїх школох би мал буц у подполносци окончени онлайн, пише на сайту Радио-телевизиї Войводини.