РУСКИ КЕРЕСТУР – Општински одбор Єдинственей Сербиї (ЄС) и Руху за социялни ратунок вчера отримал свой митинґ, односно промоцию лїстини „Єдинствена Сербия-Драґан Маркович Палма”, хтора ма 37 кандидатох з рижних местох кулскей општини за одборнїкох до Скупштини општини (СО) Кула.
Медзи кандидатами за одборнїкох у СО Кула и двойо з Руского Керестура – Михайло Сопка и Марина Преґун, котра ше представела своїм согражданом и поволала их най потримаю лїстину ЄС, хтора на локалних виберанкох будзе под числом 3.
На промоциї бешедовали предсидатель Општинского одбору ЄС и Руху за социялни ратунок Драґутин Медоєвич, кандидат за предсидателя Општини Александар Зракич и даскельо кандидати за одборнїкох у СО Кула. Бешеднїки наведли же приоритети ЄС то лєпше положенє положнїцох и ваготних женох, пензионерох, привреднїкох, з акцентом на младих, як и же праве ЄС годна обезпечиц лєпши живот гражданм кулскей општини.
