НОВИ САД – Штварток, 15. октобра, у Заводзе за културу войводянских Руснацох отримана схадзка учашнїкох у проєкту Новинарскей асоцияциї Руснацох (НАР) „Приклади добрей пракси – драгоказ розуменя”, з представителями локалних електронских медийох хтори участвую у проєкту.
На схадзки бешедоване о можлївосцох дальшого сотруднїцтва, а учашнїки у проєкту винєсли и свойо оцени окончованя його фазох, емисийох и динамики їх емитованя. Проєкт перша нєзависна продукция при Руснацох, а емитованє седем емисийох по сербски почало прешлого тижня у општинох хтори облапени з проєктом.
Попри тим же радио-станїци у 7 општинох, односно городох, буду емитовац емисиї, вони буду емитовани и на Першей и Трецей програми Радио Нового Саду (РНС), хтори прилапел проєкт. Пред їх емитованьом на РНС, о тим тих дньох буду подписани и контракти.
Проєкт, хтори потримали Покраїнски секретерият за медзиреґионалне сотруднїцтво и локалну самоуправу и Канцелария ТАКСО, будзе закончени 22. октобра того року.