Путин

автор мирослав задрепко
718 Опатрене

Наслов того тексту шицко повед, и з нїм  би тот напис могол буц готови. Досц є универзални же би го кажде толмачел як му одвитує, и же би бул задовольни зоз власну интерпретацию. Чешко же отвори даяку полемику на тему дотичного, алє Боже мой, тиж так анї нє розпалї безсмислово розправи чи нам Руси братски народ, кельо раз нам у историї помогли, а кельо раз нє, и подобни нєвичерпни питаня. Алє понеже то нє продуктивне, поме дакус анализовац.

Реално, нащива предсидателя Рускей федерациї важна и посила моцне порученє. Русия член Совиту безпечносци, политично є уплївна, воєно є моцна, богата зоз природнима ресурсами и особнє думам же його нащива у ранґу нащиви Макрона, Меркеловей, лєбо Дїнпинґа. У sмислу економиї, тиж так нам є важна пре контракти хтори подписани, безцаринску тарґовину, потенциял хтори русийске тарґовище ма кед ше вежнє до огляду число людзох хтори жию у Русиї, и ище вельо койчого з обласци финансийох и привреди. И то шицко у шоре, и лєпше мац Русию на своїм боку, як процив себе, алє…

Гайд перше гевто „браца Славянє”. Окрем нас и Билорусиї, а у одношеню на „матушку” Русию, нє мам упечаток же славянски браца зложни. Нє думам ту тераз клєпац о причинох, анї их нє будзем розмервйовац бо  ту змервени и релиґиї, и историї, и идеолоґиї, алє на концу концох, шицко ше то може звесц на политику. Єдноставно, у тим моменту ше  складаю политични интереси, и ту ше закончує цала приповедка. Кед би, наприклад, ЗАД були блїжей, америцки  ґаз би бул туньши, та бизме го куповали од нїх, а нє од Русох. Окрем кед би ше поставело горуце питанє Косова, алє, понеже бизме були купец хтори поряднє плаци америцки енерґенти, можебуц би и наша позиция при нїх була иншака, и нашо арґументи моцнєйши як цо су тераз. То роздумованє по истих принципох як гевто же да дзеведзешатих було вецей розуму на Балканє, уж бизме були у ЕУ и блїзши би нам були даєдни други  славянски браца. З єдним словом, политика.

Праве прето ме фасциновала гистерия у вязи зоз Путинову нащиву Сербиї. Те виковне товаришство, те братски народ, те тото, те гевто… Направени циркуз, як кед би нам Путин за єдно пополаднє ришел шицки економски проблеми, дзвигнул плаци и стандард, врацел Косово, обезпечел нам мир, стабилносц и благостан. Да ше розумиме, нє мам проблем анї зоз Русию, анї зоз Русами, анї зоз Путином, анї зоз русофилами. Мой проблем у тим же потрошене нє знам кельо пенєжи на цали тот циркуз, же велїм людзом нєдвосмислово дате до знаня же су длужни „спонтано” присц до Беоґраду и привитац русийского предсидателя и його домашнього. Мам проблем и зоз тим же його нащива нє звекша плаци, нє приведзе до шора институциї, нє принєше мир и благостан, гоч шицко  представене праве як таке. ОК, нащива важна, то нє спорне, алє спорни способ на хтори є представена. Подумал би чловек, жиєме у раю и Бог особнє пришол. А анї єдно, анї друге нє точне.

ПОВЯЗАНИ ТЕКСТИ