БЕОҐРАД/КУЛА – Информативно-пропаґандни центер (ИПЦ) Кула пондзелок, 31. авґуста, предати єдиному учашнїкови на лицитациї – Радованови Ковачови з Кули за 3 500 еври, цо за 226 еври вецей од початней цени – сообщела вовторок Аґенция за приватизацию.
Як дознава Рутенпрес, Ковач на лицитациї наступел як приватна особа и бул єдини купец понеже, спрам спознаньох, дзепоєдни други заинтересовани купци зоз Зомбора одустали од участвованя на лицитациї.
ИПЦ Кула тераз ма 5 занятих, понеже єден у юлию придал вимогу за одпремнїну, а двойо у авґусту.
Попри видаваня мешачних новинох „Кулска комуна”, ИПЦ Кула, односно єй „Радио Кулска комуна”, каждодньово емитує програму по сербски, руски и мадярски, раз на тидзень и по українски, а раз мешачно по нємецки.
То друга приватизация тей информативней хижи, понеже тоту з 2007. року Аґенция за приватизацию утаргла пре милионски длуства тедишнього власнїка.
Як з тей нагоди гварела директорка ИПЦ Миланка Попович, од 2010. року заняти робели за минимални плаци и з помоцу локалней самоуправи ше им удало врациц 90 одсто длуствох, так же тераз витворени добри условия за дальшу роботу.
Аґенция за приватизацию з преглашеним купцом заключи контракт о предаваню капиталу ИПЦ после доставаня позитивного думаня з Министерства финансийох – Управи за зоперанє умиваня пенєжу и Реґулаторного цела за електронски медиї о нєпостояню завадзаньох за заключованє контракту.
