ВЕРБАС – Вчера у просторийох КПД „Карпати” у Вербаше отримана друга порядна схадзка Роботного цела за младеж Националного совиту (НС) Руснацох, на хторей главна точка було розподзельованє средствох за проєкти по конкурсу Роботного цела.
Роботне цело розподзелєло средства за 15 зоз 16 проєктох, кельо сцигли на конкурс, понеже єден понукнути проєкт будзе прешлїдзени Одбору за образованє НС. За проєкти за младих у наших местох подношительом проєкттох розподзелєни вєдно 230 000 динари.
Резултати конкурсу, односно розподзельованя средствох, початком идуцого тижня буду обявени на сайту Националного совиту, а шицки подношителє о одлуки Роботного цела буду поинформовани и по интернет-адресох з хторих посилали документацию.
Члени Роботного цела за младеж НС принєсли и Одлуку о финансованю одходу ґрупи младих Руснацох на Швето култури Русинох-Українцох Словацкей у Свиднїку, дзе 19. юния пойду 6 особи – тройо члени Роботного цела и тройо студенти Одсеку за русинистику. Одлучене же за тоту активносц буду видвоєни 40 000 динари.
На схадзки винєшена и инициятива Националного совиту же би ше основало одредзену роботну ґрупу у хторей буду члени Одбору за службене хаснованє язика и писма и з Роботного цела за младеж НС, а хтора будзе задлужена за спатранє и порушованє активносцох на обезпечованю прекладательох за руски язик у локалних самоуправох.
