НОВИ САД – У Руским културним центре (РКЦ) у Новим Садзе всоботу, 11. юния отримани 15. Фестивал дзецинскей творчосци Руснацох Войводини „Веселинка”. Того року є отримани у рамикох медзинародного означованя 400-рочнїци шмерци английского и шветового писателя и драматурґа Вилєма Шекспира.
Фестивал пополадню почал з роботнями у дворе РКЦ – Подобовей, на хторей дзеци рисовали мурали, вєдно з членми ансамблу „Креативни погон” присутни уживали у їх спектакуларних роботньох и представох, а були виводзени и циркузки схопносци. Станислав Даниєл Мудрох тримали ґрафит-арт роботню, а того року була орґанизована и едукативна роботня о охрани од вилївох и як ше мож охранїц од елементарних нєпогодох.
И того року зоз своїм перформансом з балонами дзеци забавял познати „Мистер Твистер”, а „Веселинка” мала и гуманитарни бок, понеже ше зберало пластични затички у рамикох велькей акциї за помоц дзецом з инвалидитетом. Зберало ше и добродзечни прилоги за помоц старим и нємоцним особом.
Вечарша часц програми почала з наступом наймладших з обєкту „Палчочка” Предшколскей установи „Радосне дзецинство” з Нового Саду, а потим наступели школяре зоз Сримскей Митровици, з Дружтва „Русини”. Зоз Сриму до Нового Саду пришли и школяре з Бикичу, з КУД „Иван Котляревски”, як и танєчнїци з новосадского Танєчного студия „Партизан 2” – младша „Шерцочка” и старша „Лабдочки”.
На „Веселинки” участвовали и млади члени з КУД „Тарас Шевченко” з Дюрдьова, госци були и дзеци зоз Словацкого културного центру „Павел Йозеф Шафарик” з Нового Саду, а домашнїх представяли Дзецинска фолклорна ґрупа РКЦ з двома танцами, Дзецински хор РКЦ з вецей шпиванками, як и новосадски школяре з рецитациями.
На „Веселинки” пречитани и мена школярох з новосадских основних школох котри того року достали Припознанє „Славка Сабадош” Дружтва за руски язик, литературу и културу Припознанє достали школярки осмих класох Яна Бодвански, Ана Петкович и Лара Петкович. Програму водзели Александра Живкович и Любка Фечо.
Орґанизатор Фестивалу бул РКЦ, сценарий и режию „Веселинки” подписує Звонимир Павлович, а отримана є з финансийну потримовку Министерства култури РС, покраїнских сеекретариятох за образованє и за културу, Городу Нови Сад, Националного совиту Руснацох и вецей спонзорох.