Розписани конкурс за наставнїкох „Диґитална годзина”

автор сен
884 Опатрене

БЕОҐРАД – Министерство тарґовини, туризму и телекомуникацийох розписало наградни конкурс за наставнїкох основних школох „Диґитална годзина за 2016/17. рок”, з хторим жада порушац применьованє информацийней технолоґиї у настави, же би ше информатику уключело до цо вецей предметох, а у складзе зоз задатками и цилями годзини.

Приявиц ше можу шицки предметни наставнїки и класни старшини у основних школох чий снователь Република Сербия. Робота може буц з трох ґрупох наставних предметох – математики, информатики, рахункарства и технїчного образованя, алє и з дружтвених наукох, уметносцох и спорту, та природних наукох.

У роботи ма буц приказана наставна єдинка у хторей ше як наставне средство хаснує и информацийну технолоґию (ИТ), як и активносци хтори витворени у одредзеним часовим периодзе, дзе ИТ участвовала у ришованю даєдного воспитно-образовного проблему, як цо то дисциплина, мотивация, увага, одсуство.

Першонаградзени (по два роботи з трох ґрупох предметох) достаню 70 000 динари, друга награда (за по три роботи з трох ґрупох предметох) 50 000 динари, а треци награди будзе аж 36, за хтори опредзелєни 30 000 динари.

На конкурс „Диґитална годзина за 2016/17. рок” ше мож приявиц од 4. по 15. новембер, а вецей информациї мож опатриц на линку https://mtt.gov.rs/vesti/raspisan-nagradni-konkurs-digitalni-cas-201/

ПОВЯЗАНИ ТЕКСТИ