Рочна схадзка Рускей матки будзе 21. фебруара у Вербаше

автор зам
1.3k Опатрене

РУСКИ КЕРЕСТУР – Порядна рочна Скупштина Рускей матки (РМ) будзе отримана 21. фебруара у Вербаше, у просторийох КПД „Карпати” – одлучене на вчерайшей схадзки Управного одбору (УО) РМ у Руским Керестуре. У рамикох Скупштини, после єй роботней часци, у вербаских „Карпатох” будзе виведзена и єдна представа з Руского фестивалу малих сценских формох „Дюра Папгаргаї”.

Як догварене на схадзки, пред отримованьом Скупштини цалей орґанизациї, и месни, односно Городски и Реґионални одбор РМ маю отримац свойо рочни схадзки, на хторих винєшу звити о роботи у прешлим, и плани роботи за 2015. рок.

4-RM-02

На УО прилапена и програма означованя 25-рочнїци РМ, хтора будзе 27. и 28. децембра того року у Руским Керестуре, а з описом цалей програми, Одбору за културу Националного совиту Руснацох, Заводу за културу войводянских Руснацох и Месней заєднїци Руски Керестур, РМ полала и вимогу за финансованє означованя рочнїци, а цалосни потребни средства оценєти на 250 500 динари.

Идуцого тижня до Сербиї, односно до РМ ма сцигнуц и кнїжка у виданю Шветового конґресу Руснацох/Русинох/Лемкох (ШК РРЛ) „Коляди РРЛ”, за хтору ше могло, а и надалєй мож предплациц у Канцелариї РМ у Руским Керестуре, лєбо у месних одборох, та Городским у Новим Садзе и Реґионалним одборе Матки у Шидзе.

Тираж кнїжки „Коляди РРЛ”, у хторей текстуално и нотно записани коляди зоз жемох дзе жию Руснаци, обявена початком децембра прешлого року у 700 прикладнїкох и каждей з 10 членїцох ШК припадню по 70 прикладнїки. Єден прикладнїк кнїжки кошта 7 еври, лєбо 1 000 динари.

ПОВЯЗАНИ ТЕКСТИ