НОВИ САД – Новинско-видавательна установа „Руске слово“ на пондзелок, 15. юния, означи 70 роки виходзеня тижньових новинох „Руске слово“. Рочнїца будзе означена зоз шветочну академию у „Студию М” Явней медийней установи РТВ у Новим Садзе, а почнє на 13 годзин. Шветочну академию директно будзе преношиц и Радио Нови Сад, у терминє емисиї „По наших местох”.
Попри занятих, вонкашнїх сотруднїкох и колеґох з других медийох на рижних уровньох, „Руске слово“ на академиї привита и векше число визначних госцох з державних и покраїнских орґанох, з амбасадох України и Словацкей Републики у Сербиї, представительох снователя – Националного совиту Руснацох, представительох Апостолского еґзархату, локалних самоуправох у хторих жию припаднїки нашей заєднїци, як и представительох наших установох, школох, КУД, здруженьох и читачох.
Попри представяня роботи НВУ „Руске слово” и пригодней културно-уметнїцкей програми, на шветочносци, першираз за 70 роки виходзеня новинох „Руске слово“, Установа додзелї новинарски награди занятим: за доприношенє квалитету новинох, за рубрику, за активне информованє з терену и найвреднєйшим вонкашнїм сотруднїком старшей и младшей ґенерациї.