ДЮРДЬОВ – Члени КУД „Тарас Шевченко” з Дюрдьова ше вовторок врацели з тродньового госцованя на 18. Медзинародним фолклорним фестивалу народносцох и етнїчних меншинох „Швет под Кичеру” – „Швет пришол до Курова”, дзе Руснацох зоз Сербиї представели танєчнїки, женска шпивацка ґрупа, соло-шпиваче и тамбурови оркестер.
Фестивал тирва од 27. юния по 5. юлий, а попри концертох, його состойна часц и дефилеи з краткима танцами на улїцох, до хторих ше уключовали и патраче у вецей местох одкадз ше розселєли Лемки, Русини, Руснаци, а з цильом представяня їх култури, танцу, шпиванкох и музики.
Попри Дюрдьовчанох, перши три днї Русинох/Руснацох/Лемкох на Фестивалу представяли и два Дружтва зоз Словацкей и Польскей, а свойо народни танци и шпиванки представели и учашнїки з Турскей, Бразилу и Порторика. Руснацох зоз Сербиї тераз, по 5. юлий, на Фестивалу представяю члени ансамблу Дому култури з Руского Керестура.
Перши и други дзень Фестивал отримани у Кринїци, Уще Ґорицким и Висови у Польскей, други дзень тиж и у Курове, у Словацкей.
Штерацецчленови ансамбл КУД „Тарас Шевченко” на госцованю предводзели предсидатель Дружтва Микола Кухар и члени Управного одбору Владо Балїнт, Мирослав Саламун, Саня Хромиш и Борис Балїнт, а дзивки за наступ до пасових сукньох приберала Маґдалена Надь.
У врацаню, члени ансамблу нащивели Бардейов у Словацкей и його познати Сканзен, музей на отвореним.
