СРИМСКА МИТРОВИЦА – У сали Центру за културу „Сирмиум арт” у Сримскей Митровици всоботу, 31. октобра, Руснаци з того городу успишно орґанизовали и виведли музично-литературни вечар и Митровици подаровали програму „за душу”. Присутни патраче, Руснаци и їх приятелє и почитователє, кажду точку наградзели з вельким аплаузом.
Програма була конципована так же би задоволєла смаки и младшей и старшей публики – од народних писньох по класичну и популарну музику.
У блоку класичней музики участвовала „музична надїя” Исидора Козлина на флаути и професорка клавиру Милда Желем Кузминац, котри грали композициї Й. С. Баха.
Популарну музику и точки о теориї музики виведла мастер, музични педагог Даниєла Горняк, вєдно з Николину Думанчич, як госцинску Руснацох того вечара.
У литературней часци Катарина Бережни пречитала два писнї – „Хижочко стара” Михала Ковача и писню активистки Руснацох зоз Сримскей Митровици Олґи Олєар Раїч. Писню „Шкорванчок” Гаврила Костельнїка пречитала Милена Костич, а Звонко Беднар гуторел прозни текст „О хлєбу”.
Шпивацка група, под руководительством Даниєли Горняк одшпивала два шпиванки – „Кед голубица лєцела” и „Били оргони”, а на клавиру их провадзела Милда Желем Кузминац.
Тот успишни вечар реализовали члени Подручней канцелариї Националного совиту Руснацох у Сримскей Митровици, а орґанизацийно го помогнул „Фонд Бесерменї”.
