СРИМСКА МИТРОВИЦА – Вчера вечар у грекокатолїцкей парохиї у Сримскей Митровици отримана преслава Националного швета Руснацох, а першираз ю орґанизовали члени обидвох дружтвох Руснацох у тим городзе – Дружтво Руснацох у Сримскей Митровици и Здруженє „Руснак”. Тиж так, з програму у Митровици, нашо швето означели и Руснаци з Бикичу. Медзи другима, швето Митровчаном и Бикичаном повинчовала и членїца Вивершного одбору Националного совиту Руснацох Наташа Регак.
На початку премиєрно одпатрени спот за шветочну шпиванку Руснацох у Сербиї „Браца Русини” (у продукциї Здруженя „Руснак”), а потим, з оркестром „Ходоба и приятелє”, наступела Женска шпивацка група, под руководительстве Нади Адамович, Мишана шпивацка група, под руководительстве Станислави Будишин и з клавирским провадзеньом Бояна Кляїча, як и Дзецинска шпивацка група „Руски гвиздочки” зоз трома шпиванками.
Дзеци котри пестую руски язик наступели з два рецитациями, а як госци наступели и дзецинска фолклорна секция КПД „Иван Котляревски” з Бикичу, та українске дружтво „Коломийка”.
