КОЦУР – У Велькей сали Месней заєднїци у Коцуре вчера, 30. юния, малим матурантом Основней школи „Братство єдинство” уручени свидоцтва о законченим основним образованю. Тиж, школяром уручени и дипломи котри здобули под час школованя, як и Вуково дипломи.
З тей нагоди директорка Основней школи Сенка Мученски шицким присутним малим матурантом повинчовала на успиху котри зазначели, и вєдно зоз класнима старшинами, пожадала вельо щесца у дальшим образованю, як и у живоце.
Школяре седмих класох своїм товаришом пририхтали пар слова, а каждому матурантови уручели по єдну ружу. Найуспишнєйши школяре за свойо закладаня були наградзени зоз кнїжками и дарунками, а окреме похвалєна школярка ґенерациї, школярка руского оддзелєня Мартина Уйфалуши.
За будуцих стредньошколцох тераз шлїдзи пополньованє лїстини жаданьох, а потим и упис до жаданих стреднїх школох.