КУЛА – У Основней школи „Петефи бриґада” вчера подзелєни свидоцтва 20-ерим школяром котри закончели єден з трох циклусох образованя за одроснутих („Друга шанса”). Медзи нїма и шесцеро Керестурци, з котрих двоме закончели треци циклус (7. и 8. класу).
Свидоцтва одроснутим школром уручела андраґоґ Школи Снежана Радоєвич, котра похвалєла упартосц и роботу школярох и поволала их же би предлужели свойо школованє.
Дзепоєдни школяре (єден и з Руского Керестура) достали и дипломи за окремне закладанє, успих и коректне одношенє.
Образованє за одроснутих у спомнутей кулскей школи орґанизоване уж штварти рок и дотераз 84-еро закончели треци циклус (7. и 8. класу).
Заинтересовани котри жадаю закончиц основне образованє можу ше явиц на телефон Школи (025)723-944, андраґоґови Снежани Радоєвич.
Настава почнє штредком октобра, а будзе орґанизовани и безплатни превоз з местох кулскей општини до Кули, та и з Руского Керестура.
