БЕОҐРАД/АРАНДЄЛОВАЦ/НОВИ САД – Вецей орґанизациї того тижня орґанизую семинари, округли столи и конференциї за членох националних совитох (НС) националних меншинох, на хторих буду присуствовац и члени НС Руснацох.
Вчера у Беоґрадзе Поверенїк за защиту ровноправносци и представителє Хижи за людски права и демократию у Беоґрадзе отримали схадзку з представителями НС у Сербиї, на хторей их упознали з проєктом „Най ровноправносц постанє стварносц”, хтори ше витворює з потримовку Амбасади Норвежскей у Сербиї.
Нєшка, 10. децембра, Канцелария за людски и меншински права Влади Сербиї у Клубу посланїкох у Беоґрадзе орґанизує конференцию з назву „Нови механїзми за провадзенє стану людских правох у Републики Сербиї”. Конференция орґанизована з потримовку Делеґациї ЕУ у Сербиї, а у рамикох означованя Медзинародного дня людских правох у Сербиї.
Нєшка и у Арандєловцу почина и штиродньови семинар за нововибраних членох националних совитох, на хторим буду информовани о роботи националних совитох, мандату и компетенцийох, та улоги НС спрам комнпетенцийох локалней самоуправи. Семинар орґанизую Центер за виглєдованє миґрацийох, Мисия ОЕБС у Сербиї и Фондация Фридрих Еберт у Беоґрадзе.
На ютре, 11. децембра, у Велькей сали Скупштини АП Войводини будзе округли стол з тему „Медийски закони на локалним уровню”, хтори орґанизує Оддзелєнє за медиї Мисиї ОЕБС у Сербиї и Нєзависне дружтво новинарох Войводини, а з потримовку Скупштини АП Войводини и Покраїнского секртарияту за културу и информованє. Ютрейши округли стол почнє на 11 годзин.