ДЮРДЬОВ – Пондзелок, 21. септембра, на Рождество Пресвятей Богородици по юлиянским календаре, у дюрдьовскей грекокатолїцкей церкви преславене храмове швето – Кирбай.
Архиєрейску Службу Божу предводзел наш апостолски еґзарх, кир Георгий Джуджар, а сослужовали двященїки з наших и других местох – о. Владислав Варґа, о. Владислав Рац, о. Юлиян Рац, о. Борис Холошняй, о. Платон Мирослав Салак и о. Алексий Гудак. На Служби шпивал Церковни хор „Розанов”, под дириґентством Татяни Барна, а у Хору шпивали и дюрдьовски парох о. Йоаким Холошняй и ґосподїнски парох о. Михаил Холошняй.
Домашнї о. Йоаким Холошняй привитал шицких присутних, а потим бешедовал о значеню швета народзеня Пречистей Дїви Мариї и о значносци дюрдьовского святого храму, хтори нашо предки збудовали 1900. року.
Владика Георгий у своєй казанї визначел же тото швето припомина на вельку Божу любов и його милосердиє спрам цалого людского роду.
– На нєшкайши дзень пришла на швет тота котра була обецана од Господа Бога ище у Раю, же прейґ нєй придзе спасенє. Вона народзи, вихова и пожертвує за нас спасителя Исуса Христа, Господа нашого. Прето вона и Божа мац и ми ю почитуєме як мацер Божу и любиме и як нашу мацер, покровительку, помоцнїцу у шицких наших потребох, нєвольох, нєщесцох и церпеньох – гварел у казанї кир Джуджар.
И на Служби и на обиходу коло церкви присуствовло красне число вирнїкох и парохиянох, нє лєм з Дюрдьова, алє и з других наших местох, та и з иножемства.
Преслава Кирбаю предлужена у парохийним доме и обисцох Дюрдьовчанох, а и того року у Рускей улїци коло нашей церкви була богата вашарска часц Кирбаю.
