БЕОҐРАД – Всоботу, 17. октобра, Владаюца Сербска напредна странка (СНС) означела седемрочнїцу снованя. Рочнїца означена зоз сходом членох странки и госцох у Центре „Сава”у Беоґрадзе, на хторим, попри других, бешедовали и терашнї предсидатель странки и премиєр Сербиї Александар Вучич, як и снователь и перши предсидатель СНС, терашнї предсидатель Сербиї Томислав Николич.
СНС основана 10. октобра 2008. року, а настала з видвойованьом фракциї зоз Сербскей радикалней странки (СРС) позбераней коло Томислава Николича, у септембру спомнутого року.
Николич 5. септембра 2008. року дал задзекованє на место шефа Посланїцкей ґрупи радикалох у Народней скупштини и на место заменїка предсидателя СРС, и у Скупштини основал Посланїцку ґрупу „Напредок Сербийо”. После того му ше придружел и бувши ґенерални секретар СРС Александар Вучич и други функционере радикалох.
Томислав Николич 2012. року постал предсидатель Сербиї и по виборе на тоту функцию напущел СНС, а за предсидателя СНС вибрани Александар Вучич, котри од 2012. по 2014. рок бул подпредсидатель, а од 2014. року є актуални предсидатель Влади Сербиї.
Спрам податкох зоз странки и других жридлох, СНС нєшка наймасовнєйша политична партия у Сербиї. На остатнїх виберанкох за републични парламент, вєдно з коалицийнима партнерами, освоєла 48,35 одсто гласох, а и з другима странками хтори нєшка творя владаюцу коалицию, у Народней скупштини ма прейґ 200, з 250 народних посланїкох.
