РУСКИ КЕРЕСТУР – На рочней Скупштини керестурского Спортского дружтва „Русин” (СД), хтора отримана внєдзелю, 1. фебруара, за найлєпшого спортисту цалого Дружтва преглашена каратистка у сениорскей конкуренциї Вероника Юрич, а за найлєпшого младого спортисту на уровню Дружтва преглашена атлетичарка Кристина Катона.
Преглашени и найлєпши спортисти у „Русинових” клубох, та найлєпши фодбалер у прешлим року то Дьордє Букейлович, найлєпша рукометашка Сабина Планчак, най-рукометаш сениор Славко Гербут, юниор Родерик Бучко, а найлєпша каратистка Сара Планчак.
Звит о роботи цалого Дружтва на рочней схадзки поднєсол предсидатель „Русину” Драґан Ковачевич, котри визначел же и прешлого року активно робели 10 клуби, у хторих єст коло 400 спортистох и 60 спортских роботнїкох. Звити о роботи винєсли и представителє клубох СД.
Єдно з главних опредзелєньох Дружтва у тим року будзе дальше омасовйованє членства и прицагованє дзецох и младих до своїх клубох, як и намаганє же би спортисти цо скорей почали тренировац у новей спортско-школскей гали, гварел Ковачевич.
На схадзки Скупштини присуствовал и предсидатель Совиту керестурскей Месней заєднїци (МЗ) Владимир Олеяр, котри гварел же МЗ и того року пенєжно наградзи преглашених найлєпших спортистох, алє потолковал и опредзелєнє Општини Кула же би ше галу почало хасновац аж после законченя шицких потребних правно-технїчних роботох, односно док Општина, як совласнїк, право хаснованя урядово пренєше на МЗ.
