ПОКРАЇНСКА ВЛАДА – На основи конкурсу Покраїнского секретарияту за образованє, предписаня, управу и национални меншини-заєднїци и општини Кула, Вербас, Жабель и Шид, та Город Нови Сад тих дньох достали средства за реґресованє трошкох превозу штредньошколцох з места биваня до места школованя, од септембра по децембер того року.
Општина Кула за тоту намену з Покраїни достала 2 милиони 785 622 динари и по 12. децембер тирва конкурс за школярох котри путую до школи, а условия конкурсу и потребну документацию мож видзиц на сайту www.kula.rs.
Општина Вербас достала 832 565 динари, Општина Жабель милион 798 340, Општина Шид милион 569 384, а Город Нови Сад милион 029 605 динари.
За спомнуту намену средства од Покраїнского секретарияту за образованє тераз достали 43 локални самоуправи, вєдно 70,8 милиони динари, а исти конкурс будзе розписани и нарок.