НОВИ САД – Министер нукашнїх дїлох Сербиї Небойша Стефанович виявел вчера же число виновинох дїлох у Новим Саду зменшане за коло 37 одсто, а ришованє найчежших виновних дїлох звекшане.
Министер Стефанович у Новим Садзе присуствовал на придаваню 50 защитних балистичних лайбикох у рамикох акциї „Полицай у заєднїци” и з тей нагоди визначел же полиция лєпше опремена дзекуюци лєпшому сотруднїцтву локалней самоуправи и гражданох.
По його словох, циль акциї „Полицай у заєднїци” указац же з добрим сотруднїцтвом мож зменшац криминалитет, а гражданє можу видзиц як полиция роби.
Министер Стефанович, вєдно з городоначалнїком Нового Саду Милошом Вучевичом, обишол пункти орґанизацийних єдинкох Полицийней управи Нови Сад, чийо припаднїки представели способи роботи и механїзми помоци з хторима ше стараю о безпечносци гражданох, наводзи ше у сообщеню з Министерства нукашнїх дїлох.
Стефанович новинаром у Новим Садзе потвердзел же премиєрови Вучичови предложене же би ше з окремнима мирами змоцнєло гранїци Сербиї и зопарло масовни илеґални преходи миґрантох, як и же потребна векша борба процив гулиґанох и криминалу хтори походзи од єдней часци особох кори припадаю навияцким ґрупом.