НОВИ САД – Стипендию Фонду за млади таланти „Доситея” того року достали 326 найлєпши студенти закончуюцих рокох основних и мастер студийох новосадского Универзитету.
Медзи стипендистами и Борис Барна з Руского Керестура, студент закончуюцого року на Факултету спорту и физичного воспитаня, чий просек оценох 9,53.
– Тота стипендия резултат мойого тророчного труду и укладаня. Зоз знаньом зме себе обезпечели пенєж за трошки на студийох, алє и за друге, понеже вона виноши тельо кельо дакому єдна мешачна плаца. Док закончим основни студиї, плануєм ше уписац на мастер, а потим и на докторски студиї – гварел Борис.
Стипендиї найлєпшим студентом 12. априла на Петроварадинскей твердинї уручели министер младежи и спорту Ваня Удовичич, котри и предсидатель Фонду за млади таланти, як и городоначалнїк Нового Саду Милош Вучевич.
З тей нагоди министер Удовичич, медзи иншим, гварел же знанє стипендистох найпрестижнєйши бренд Сербиї, як и же ше старанє о нїх нє закончує з виплацованьом стипендийох.
Городоначалнїк Вучевич визначел же и стипендисти доприноша кандидатури Нового Саду за младежску престолнїцу Европи, односно европску престолнїцу младих 2019.