НОВИ САД – Ґрупа школярох нїзших класох основней школи з Руского Керестура, з вироучительками ш. Марию и ш. Веронику, внєдзелю, 28. фебруара у Новим Садзе мали стретнуце зоз своїма парняками котри ходза на виронауку у грекокатолїцкей парохиї св. апостолох Петра и Павла.
Госци, вєдно з домашнїма вироучительками ш. Георгию и Меланию Римар нащивели нашу церкву, дзе шицки вєдно вимодлєли кратку молитву, а потим у Церковней сали св. Миколая предлужене друженє. Керестурцох привитал и новосадски парох о. Юлиян Рац.
През преширену годзину виронауки и бависко дзеци ше швидко поупознавали, за шицких була пририхтана и закуска, а кажде достал и скромни дарунок як памятку на тото госцованє.
Циль стретнуца бул указац дзецом же школяре ходза на виронауку у каждей нашей парохиї и же, окрем друженя у школох, важни и таки нащиви и зблїжованя.