КУЛА – У рамикох „Костельниковей єшенї” всоботу, 21. новембра, у ОШ „Петефи бриґада” у Кули отримане традицийне Стретнуце рецитаторох.
Спред Руского КУД „Гавриїл Костельник”, хторе и орґанизатор тей манифестациї, присутних привитал його предсидатель Владимир Бучко. Вон подзековал шицким учашнїком и їх наставнїком на участвованю и наглашел значносц рецитованя у пестованю руского язика. Водитель програми була Амалия Ковач, котра пририхтала и красну сценоґрацию з вишивкох, фитюли, кудзелї и плодами єшенї.
У катеґориї младшого возросту найчисленши були Кулянци, понеже наступели штири рецитаторки – Лара Сопка, Лїляна Кнежевич, та Мария и Наталия Жирош. З Вербасу у тим возросту рецитовали Антоний Контра и Митро Уйфалуши, з Нового Орахова Даниєла Бицок и Лана Хорват, з Дюрдьова Милица Михальовски, з Коцура Катарина Недич, а з Руского Керестура Минеа Югас.
У катеґориї штреднього возросту на Стретнуцу рецитаторох участвовали Валентина Салаґ з Дюрдьова, Божидар Загорянски, Матия и Мина Шермет зоз Шиду, Теодора и Ирена Ванчик зоз Сримскей Митровици, Матей Шепински з Руского Керестура и Дияна Канюґа з Кули.
У старшим возросту наступели Тимеа Будински и Мирослав Малацко, обидвойо рецитаторе з Руского Керестура.
Рецитаторох котри участвовали на Стретнуцу у Кули пририхтали Яким Гарди у Дюрдьове, Ивана Дудаш у Руским Керестуре, Весна Дринчич Дїлас у Коцуре, Сенка Бенчик у Орахове, Славица Мали у Вербаше, Златица Сивч Здравич у Шидзе, Моника Абодї у Сримскей Митровици и Амалия Ковач и Мария Стрибер у Кули.
На програми привитани и предсидателька Одбору за образованє Националного совиту Руснацох, редакторка „Заградки” и тераз наша „найрецитованша” поетеса за дзеци Мелания Римар, и член фаховей комисиї на уровню Покраїни хтора оценює рецитаторох на општинских, зонских и Покраїнскей смотри Михайло Зазуляк.
Гоч того року участвовали менєй рецитаторе як скорей, квалитет рецитованя бул на задоволюцим уровню, алє на програми хибели и дзепоєдни музични точки, а виостало и наградзованє шицких учашнїкох з рускима кнїжками, як то була пракса скорейши роки.
