КРУЩИЧ – Општински одбор Лиґи социялдемократох Войводини (ОО ЛСВ) Кула всоботу, 19. септембра, на беґелю у Крущичу отримал цалодньове друженє своїх членох, на хторим присуствовали и госци з Бачу, Суботици, Бачкей Тополї, Зомбора и Вербасу. На сходзе присуствовали и предсидатель ЛСВ Ненад Чанак и предсидателька ОО ЛСВ Кула и народна посланїца Олена Папуґа, предсидатель Месного одбору Лиґи Милорад Булатович Ґула, як и предсидателє одборох тей странки зоз сушедних општинох.
Ненад Чанак и з тей нагоди визначел же и после 25 рокох єй постояня, програмни начала ЛСВ и надалєй исти – Лиґа ше заклада за антинационализем, антитоталитаризем, за автономию Войводини и ровноправносц шицких єй гражданох, у чим странка вимага приношенє нового Уставу, хтори Войводини да законодавну, судску, вивершну власц, як и власни жридла приходох. Закладанє Лиґи и же би нови Устав одредзел же ше „войводянску жем нє шме предавац странцом”, а таке опредзелєнє Чанак визначел и у розгварки з присутнима парастами.
Предсидателька ОО ЛСВ Кула Олена Папуґа на сходзе у Крущичу наглашела же Сербиї потребне децентрализованє, за цо ше Лиґа бори 25 роки, а тиж гврела же ше ОО Кула преширює з новима членми и пририхтує за наиходзаци локални виберанки, на хтори ЛСВ, як и на покраїнски, вироятно видзе самостойно.