ВЕРБАС – Вчера у КПД „Карпати” у Вербаше отримана схадзка представительох Дружтва з предсидательом Националного совиту (НС) Руснацох Славком Рацом, предсидательом Вивершного одбору НС Жельком Ковачом и членїцу Совиту и предсидательку Одбору за културу НС Ґабриєлу Саянкович.
Проблеми з хторима ше „Карпати” тераз стретаю на схадзки винєсли предсидатель Дружтва Деян Загорянски, подпредсидателька Єлена Кузма, секретар Дружтва Владимир Мученски, та Звонко и Славко Сабово, Янко Сеґеди, Михал Тамаш и Владо Няради.
Бешедоване о дзепоєдних финансийних ришеньох, виплацованю гонорарох, архиви по руски з ЯП за информованє Вербас хтору би требало превжац и зачувац, понеже тото Подприємство пред гашеньом, та о проблемох вязаних за образованє.
Пре порушованє ґрупи за пестованє руского язика у Предшколскей установи „Бошко Буха” на схадзки предложене же би ше почало з анкетованьом родичох, пре спознанє о числу дзецох у тей можлївей ґрупи. У Дружтве уж єст список з обидвох вербаских парохийох на хторим 21 дзецко, чиїх родичох ше будзе контактовац и анкетовац.
Крем того, у КПД „Карпати” маю задаток пренайсц руководителя оркестру пре формованє векшого тамбурового оркестру, понеже без нього шпивацки и танєчни секциї нє можу функционовац.
На концу вчерайшей схадзки подобови уметнїк з Вербасу Владо Няради з тей нагоди Националному совиту подаровал єден свой малюнкох, як цо то скорей уж подаровал малюнки подручним канцеларийом НС и КУД у руских штредкох, руским институцийом и установом.