СЕНТА/РУСКИ КЕРЕСТУР – Делеґация Инициятивного одбору за ришованє проблему з воду при Месней заєднїци Руски Керестур и Комисиї за воду Еколоґийного руху „Желєни персцень” вовторок, 10. марца, нащивела фабрику за пречисцованє води у Сенти, хтора роби у составе компаниї за продукованє пекарского квасу „Алтек Сербия”.
По словох членох делеґациї – покраїнского посланїка Славка Раца и предсидательки Елоколоґийного руху др Леони Доротич Ґутеша, сучасна америцка технолоґия хтору видзели у Сенти могла би у цалосци буц применєна и у потенциялней фабрики води у Керестуре.
То Керестурцох опредзелєло за преберанє дальших крочайох у витвореню того велького подняца, а перши будзе виробок проєктней документациї, за цо треба конкуровац до Покраїнского секретарияту за польопривреду, лєсарство и водопривреду.
Попри спомнутих, у керестурскей делеґациї у Сенти були и предсидателька УО „Желєного персценю” др Лилияна Соколова, о.д. секретара Месней заєднїци Юлиян Медєши, директор ЯКП „Руском” Иґор Фейди, спред локалней самоуправи Стєпан Вакула, як и фахови консултант за проєктантску компанию СИД Велько Сузич зоз Зомбора.