КРАСНА/ҐОРЛИЦИ (ПОЛЬСКА) – У Красней и Ґорлицох у Польскей того викенду, 15. и 16. октобра, будзе отримана уж 24. Културна манифестация „Лемковска творча єшень”, на хторей участвую русински писателє з вецей жемох. Главни орґанизатор Манифестациї Здруженє Лемкох, а соорґанизатор Руска бурса (берза) з Ґорлицох.Того року партнер у орґанизациї и Основна школа у Красней, а медийну потримовку Манифестациї дава Медийна ґрупа ЛЕМ.фм.
Тогорочна манифестация будзе у знаку 100-рочнїци шмерци Клавдиї Алексович (1830-1916), родом з Красней, котру тримаю за першу даму лемковскей литератури. Клавдия Алексович була єдна з ридких школованих лемковских женох у тедишнї час, снователька и активистка перших лемковских орґанизацийох, писала за дзеци и одроснутих, а похована є на Личаковским теметове у Львове, у України.
У Красней (хторе и родне место познатого русинско-лемковского писателя Ивана Русенка) и у Ґорлицох на тогорочней „Лемковскей творчей єшенї” участвую писателє з Польскей, Словацкей и України, а у музичней часци наступя школяре з Основней школу у Красней, Ансамбл „Терочка” Рускей берзи, шпивачка Леся Мацков-Ґорлицка з України и ансамбл „Дулярово браца”. О живоце и творчосци Клавдиї Алексович будзе бешедовац др Олена Дуц-Файфер.