Того викенду 55. Фестивал рускей култури „Червеней ружи“

автор зам
943 Опатрене

РУСКИ КЕРЕСТУР – Того викенду, 1. и 2. октобра, у Руским Керестуре будзе отримани 55. Фестивал рускей култури „Червена ружа“.

Найстарши и найвекши фестивал Руснацох на тих просторох того року преложени зоз свойого стаємного термину – з конца юния на початок октобра, пре нєсподзиване упокоєнє нашого визначного музичара, композитора и фахового руководителя Юлияна Рамача Чаму з Руского Керестура, праве на дзень кеди мал почац Фестивал, 24. юния.

Червена ружа” того року перши раз будзе отримана у керестурскей Спортскей гали, а на соботу, 1. октобра, почнє з отвераньом вистави подобових роботох авторки Андєлки Античевич з Беркасова, на 16 годзин у голу Спортскей гали.

Исти дзень, на соботу, на 16,30 годзин будзе музично-танєчна манифестация дзецох „Червене пупче“, а потим на 20 годзин обновена манифестация Фестивалу „Одгуки ровнїни“, на хторей участвую скоро шицки музично-фолклорни ансамбли з наших местох.

На нєдзелю, 2. октобра на 17 годзин будзе менифестация „Червена ружа” – традицийне змаганє наших младих шпивачох за кошарку червених ружох и чобольов, а у ревиялней часци буду виведзени забавни композициї з компакт-диску „Лєм єден погляд“ Златка Русковския.

Тогорочни Фестивал на нєдзелю будзе закончени зоз Шветочним концертом, хтори почнє на 20 годзин, а наступя нашо ансамбли з найквалитетнєйшима точками. Музично-танєчни секциї керестурского Дому култури пририхтали и одредзене сценске подзекованє свойому фаховому руководительови Юлиянови Рамачови Чамови, а як госц „Ружи” на Шветочним концерту наступи ансамбл КУД „Святи Сава” зоз Шиду.

ПОВЯЗАНИ ТЕКСТИ