РУСКИ КЕРЕСТУР – Национални совит Руснацох у Руским Керестуре того тижня нащивя представителє Министерства просвити, представителє Делеґациї Европскей униї у Сербиї, делеґация Пряшовского самоуправного краю зоз Словацкей, як и заменїца Покраїнского омбудсмана за защиту правох националних меншинох.
Представителє Министерства просвити Влади Републики Сербиї до НС Руснацох у Руским Керестуре приходза на ютре, 3. фебруара на 10 г, дзе з представителями НС и його Одбору за образованє, як наявене, будзе бешедовац др Ґоран Башич, член Роботней ґрупи за унапредзенє образованя националних меншинох, як и фаховци з Министерства. Розварки Министерства з представителями националних совитох унапрямени на утвердзованє Акцийного плану за образованє националних меншинох на шицких уровньох, а у рамикох Стратеґиї розвою образованя у Сербиї по 2020. рок.
На стреду, 4. фебруара, на 11 г., НС Руснацох нащивя шеф Политичного одзелєня Делеґациї ЕУ у Сербиї Лука Бянкони и совитнїк за питаня демократизациї Делеґациї Ґордана Арацкич Николич, дзе з представителями Совиту и його одборох буду бешедовац о положеню и витворйованю правох Руснацох, як националней меншини у Сербиї.
Понеже того тижня у нашей жеми будзе пребувац Делеґация Пряшовского самоуправного краю пре конкретизованє подписаного Спорозуменя о сотруднїцтве з АП Войводину, у рамикох тей нащиви на стреду, 4. фебруара (после 12 годзин) представителє Пряшовского самоуправного краю приду и до Руского Керестура, дзе нащивя дзепоєдни нашо установи.
На пияток, 6. фебруара, од 13 до 14 годзин заменїца Покраїнского омбудсмана за защиту правох националних меншинох Ева Вукашинович у Руским Керестуре з предсидательом НС Руснацох Славком Рацом будзе бешедовац о актуалних питаньох у обласци витворйованя, защити и унапредзеня особних и колективних правох нашей националней заєднїци.