ВЕРБАС – Националне швето Руснацох всоботу означене и з Архиєрейску благодарну Службу Божу у церкви Покрова Пресвятей Богородици у Старим Вербаше, хтору предводзел апостолски еґзарх за грекокатолїкох у Сербиї кир Георгий Джуджар.
Сослужели о. Владислав Варґа, о. Михайло Режак, о. Владислав Рац, о. Михайло Малацко, о. Юлиян Рац, о. Дарко Рац, домашнї о. Алексий Гудак, о. Платон Салак, о. Владимир Еделински Миколка, котри читал Євангелию, о. Игор Вовк и о. Михайло Шанта. Апостол читал школяр з Вербасу Павле Медєши.
Владика кир Георгий привитал присутних у полней церкви, медзи хторима були и монахинї и представнїки дружтвено-политичного живота – народна посланїца Олена Папуґа, помоцнїк предсидателя Општини Вербас Ксиния Бенце и заменїк предсидателя Скупштини општини Вербас Виктор Бесерминї.
– На тих просторох зме од 1751. року глїбоко пущели свойо коренї и дзекуєме Господу Богу, хтори пан историї, за його благослов хтори нас очувал и у радосних и у смутних часох. Церква свидома своєй мисиї и улоги. У Вербаше вона вше була зоз своїм народом, алє и з другима народами, а резултат то добри одношеня. Модлїме благослов Божи и хаснуйме його дари и ласки – поручел владика Джуджар.
На концу одшпиванe многолїтствиє, а на приходу на Службу шицким подзековал парох старовербаски о. Алексий Гудак.
