БЕОҐРАД – Як концом прешлого тижня сообщел министер тарґовини, туризму и телекомуникацийох Расим Ляїч, од 1. юлия у реґионе туньши услуги роминґу за гражданох Сербиї, Черней Гори, Босни и Герцеґовини и Македониї.
Нїзши цени роминґу у спомнутих штирох жемох реґиону резултат применьованя другей фази спорозуменя подписаного у септембру 2014. року и як гварел Ляїч, место дотерашнїх 0,29, минута воланя до спомнутих штирох жемох тераз 0,24 еври, а прилапйованє воланя 0,07, место 0,08 еври за минуту.
СМС поруки тераз 0,08, место 0.09 еври, а найбаржей потуньшело хаснованє интернету, бо 1 меґабайт тераз кошта 0,45, место дотерашнїх 0,70 еври.
Ляїч гварел же цена роминґу штреднє туньша за коло 20 одсто, а о рок, тиж од 1. юлия, цени роминґу у тих штирох жемох буду ище нїзши.