Окрем того же є одлична школярка штвартей класи Основней школи „Братство єдинство” у Коцуре и же у дньовнїку зазначує сами петички, Рамона Будински и барз крашнє рисує, збера награди на подобовох конкурсох, люби рецитовац, танцовац, а схопна є и кошаркашка. Одгадла нам цо найволї представиц на своїх малюнкох, а бешедовала нам и о других своїх интересованьох.

Рамона одмалючка була барз активна, любопитлїва и схопна, а найволєла на папер пренєсц чаривносци яки задумала у своєй глави. Идеї викуковали зоз шицких бокох коло нєй, инспировали ю облюбени животинї, хвильки, думки…

– Найволїм рисовац зоз фломастерами и темперами, а на своїх малюнкох любим хасновац и шльокици (ґлитери). Кед рисуєме на даяку задату тему, инспирацию вше находзим у своєй мриї. А найщешлївша сом кед рисуєм конї, прето же их барз любим – гвари Рамона.

Єй рисунки були наградзени на двох конкурсох котри розписала Явна библиотека „Данило Киш” з Вербасу, дзе участвовали школяре зоз шицких школох вербаскей општини. Медзи вецей стотки малюнками котри були приявени на конкурс, Рамоново ше видвоєли як найлєпши.

– У другей класи сом достала награду на Ярнїм конкурсу за малюнок на тему „Найкрасши слова ~ по слунку ишли”, а потим и на Єшеньским конкурсу за роботу на тему „Гомбалка витрох”. Обидва рисунки на конкурси приявела моя учителька Славица Чельовски, а и була зо мну на святочним уручованю наградох. Барз сом була щешлїва, а як награди сом достала интересантни кнїжки.

Окрем рисованя, Рамона люби и читац, окреме твори наших руских писательох, а люби и рецитовац, як и сама поскладац стищки. Участвовала на вецей рецитаторских смотрох, а порядни є учашнїк и на шицких школских програмох и рижних других културних манифестацийох.

– Найволїм рецитовац руски писньочки, а за шицки наступи ме рихтала моя учителька Славица. Вше ми ше пачели шицки писньочки котри нам вона вибрала, з радосцу сом ше пририхтовала за кажди наступ и рецитовала, прето же то наисце любим. Дакеди сом була инспирована и сама написала даяки писньочки котри були и обявени у „Заградки” – толкує далєй Рамона.

Член є и младшей фолклорней ґрупи КУД „Жатва” и, як гвари, дзечнє ходзи на проби. Наступели на вецей манифестацийох и концертох у Коцуре, як и у Руским Керестуре и Дюрдьове. Люби учиц нови танци и нови крочаї, крашнє ше дружи зоз своїма парняками на танєчних пробох и Рамона з нєсцерпезлївосцу обчекує шицки нови наступи.

Наша собешеднїца часто брала учасц и у вецей руских емисийох, як на радию, так и на телевизиї. А як окремне дожице би видвоєла тото же участвовала на єдним студентским проєкту у Новим Садзе, та ше нашла и опрез камери як статиста на знїманю филма. Окрем того, цикави ю и спорт.

– Участвовала сом на Спортско-духовним стретнуцу „Run 4unit” у Руским Керестуре, дзе було рижни интересантни бависка и веселе друженє. Тренирала сом и кошарку у Кошаркашским клубу „Олимп” и на змаганю у Степановичеве сом прешлого року освоєла перше место у шлєбодним руцаню на кош.

Рамона ше люби дружиц, люби путовац, нащивйовац и упознавац нови места. Шлєбодни час виполнює зоз товаришами и товаришками, та ше вєдно шейтаю, вожа ролери, бициґлую, а люби ше и корчоляц, як и плївац на базену.

– Барз любим животинї, дома мам мачки и пса, алє найволїм конї и вони скоро на каждим моїм рисунку. Ходзела сом до Мини школи шедланя, а того лєта ше плануєм уписац и до Школи шедланя у Конїцким клубу „Викинґ” у Ченею – визначела и додала – од предметох у школи найволїм подобове прето же любим рисовац, и физичне прето же любим буц активна, и наисце уживам у шицких своїх интересованьох – з ошмихом заключела тота всестрана школярка штвартей класи Рамона Будински зоз Коцура.