Умарла Смиля Сивч, нєшка хованє

автор зам
1k Опатрене

РУСКИ КЕРЕСТУР – У новосадским шпиталю пияток, 26. марца, умарла длугорочна наставнїца сербского (сербскогорватского) язика у ОШ „Петро Кузмяк” у Руским Керестуре Смиля Сивч.

Попри тим же 32 роки препровадзела як почитована и любена наставнїца у керестурскей Школи, Смиля Сивч була и супруга нашого музичара, композитора и музичного педаґоґа Якима Сивча.

Смиля Сивч народзена у Новим Милошеву, у Банату, 31. авґуста 1937. року (дзивоцке Радойчин) и по законченю Учительскей школи у Беоґрадзе перше почала робиц як учителька у Червинки, дзе и упознала свойого супруга Якима. Повинчали ше 26. марца 1961. року у Новим Садзе и як млада малженска пара приходза до Керестура, дзе Смиля почала робиц у ОШ „Петро Кузмяк”. Як наставнїк музичного, у истей школи познєйше робел и єй супруг Яким.

Зоз Школи до пензиї пошла 1994. року, а у Керестуре пошвидко барз добре научела руски язик, бешедовала го як свой мацерински, а сербски язик школяром преношела на интересантни способ, так же була облюбена наставнїца и колеґиня, класни старшина, водителька Литературней секциї у Школи, чийо школяре у тот час посциговали и замерковани успихи на рижних змаганьох и конкурсох.

Пре хороту, остатнї даскельо роки вецей жила у Новим Садзе и Беоґрадзе зоз своїма дзецми, а нє лєм єй школяре и просвитни роботнїки, алє и вообще – Керестурци, запаметаю ю як почитовану, приязну, дружелюбиву и толерантну особу.

За собу зохабела сина Владимира, тиж нашого познатого музичара, и дзивку Весну, нєвесту, жеца и штверо унучата, а будзе похована нєшка на 14 годзин на теметове у Руским Керестуре. Вирази сочувствия фамелия у каплїчки на теметове будзе примац после 12 годзин.

ПОВЯЗАНИ ТЕКСТИ