СЕРБИЯ – Пре злєпшованє положеня Ромох найбаржей треба робиц на обезпечованю места за биванє и условийох їх школованя, визначела директорка Канцелариї за людски и меншински права Сузана Паунович на конференциї о новей Стратеґиї за унапредзованє живота Ромох.
Плановане же Стратеґия будзе принєшена у другей половки того рока, а окрем горе наведзених приоритетох, будзе ше робиц и на обезпечованю додатних средствох за стипендиї и других формох потримовки фамелийом, та на култури и медзиромским диялоґу.
Пауновичова здогадла же предходна Стратеґия, хтора принєшена 2009. року, дала барз добри резултати у обласци инклузиї Ромох.
Окрем того документу на националним уровню, Сербия участвує и у медзинародних проєктох, дзе вєдно з 9 державами у реґионє ище од 2005. року реализує проєкт „Декада за инклузию Ромох“, з цильом злєпшаня положеня Ромох у образованю, обезпечованю роботи, здравстве и биваню, як и зопераня дискриминациї и худобства тей националней меншини.